Het D’Ierdkepelleke.

Boe steet het?

Van out de Nouwstrót, rechs, sjijns imhoehg, D’Ierdstrót èn, oane rechterkant.

Dat ze èn Gènk hin haan nie imdraeën im te booë, dat ziehn ve woal. Maer, da’s niks nouts. Asder de gesjiedenis van D’Ierdkepelleke lèèst, dan verstódder dat woal.

De Histoerie

De hiel histoerie begint mèt ’n legende. ( E bitsjen echt, och hielegans ech gebierd.)

Goonentaeren op hous oan, zieht ‘ne man e pestierken èn ‘nen eek hange. Wat doo allemool doer z’ne kop spoekde, wieëte ve nie, maer hèè poek het mèt noo tinnes. Tinnes zoehg ‘r dat het e beeldsje van O.L.Vr. woas. Saanerendoags woas dat pestierke vórt, foetsjie. ’t Sjoenste van al vonter ’t trèg op dezelfde plak èn den eegeste boom.

Dat verhoal die de ronde wei loopend licht, tot wijd boute Gènk. Bènne de kortste kiere koemen doo ‘nen hoop minse, ooch van wijer weg, bèèë bij dat Lievroobeeldsje. Het zoo dat beeldsje konne gewèèst zijn dat op ’t lèste van de 18°iew op D’Ierd oan ‘nen eek hóng.

Wei dat doo gekoeëmen ès, dat wèt God noch goeie mins.

Dan, noo den Napoleontissen tijd, bóde mer de ierste steene kepel èn 1820.

1836: ’n nouw kepel, bekostigd doer giften, vieral van Nikolaas Jacobs.

1897: Vanhaer herbód op koste van Laurentius en Jan Hendrix-Lenaerts

1901: Hendrix-Lenaerts Pieter-Jan en kinderen erven het geboo.

Het pestierke woas op ‘ne kooie kier verdwieëne en vervange doer e groeter beeld.

Pestoer Willems (Gènker gesjiedsjrijver) vont het trèg èn ‘ne verloeren hók ènne kepel, hielemool verabzjakt; de kop troaf, en nog mier van dat. E nonneke van de “Dochters van het Kruis” hit het doen hiel sjoen gerestooreerd… Wei kos zoeiet verloere geroake ? Haaë ze doen mesjein gee bezae van de wèèrde ? ’t Ès verloere gegoeën èn 1836 och 1897. Wèème wèt het ?

Maer, op 18 julie 1911, bij ’n ènbroak woert het beeldsje hielemool vernield en hèbbe ze geperbeerd de kepel èn brand te stèèke. Het nonneke restooreerde het beeldsje vanhaer en èn1912 wiert de kepel opnouw gebód door oannieëmer L. Houben vier 1200 Fr. De gemeente goehf 300 Fr en de mierrest koem van de femielies vanne Nouwstrót en van giften dei hertgins rondgehoald woere.

Noo ‘ne reesem erfenisse wiert de kepel èn 1965 verkocht oan de Fem. Cox-Hendrix Fernand-Joseph. Èn 1978 woas hèè nog den eegenaer.

Deevoosie

Al hiel lang koemen ‘r minsen op bèèvoart. Noo 1820 trok den ierste zondig van mee ’n persessie noo de kepel. Ènne stoet trokken ooch de “plechtige kemieniekante” mèt vier de “Opdracht aan Maria” Zoe stèlde ze zich onner de besjerming van O.L.Vr. Tot èn ’t begin van de joere sestig hèbbe ze dat gebreik èn iere gehaage.