Startpagina
Woordenlijst
Spelling
Taaltechnieken
Kijk en luister
Gènker Liere Lèèze
Veldeke online
Out: Vèè kalle Gènker
Historiek
Gènker Kepellekes
Wei ver het zoeal 'ns zègge
Links & bronnen
Veelgestelde vragen
Contact Sitemap Dankwoord

Het kepelleken èn de Hoehve (Driehoeven)

Ooch geniemd: het Meeveskepelleke. (fam. Meyvisch)

 

Boe steet het

 

Ge vènt het èn de lèste pijpekop van de Maaretakstrót èn de wijk Heebloeëk (Heideblook) tèssen de Hoehve en Hoevezoavel. Het likt hie-

legans èngesloeëten èn ’t griehn oane rand van ‘n aad bèske. Gee kleen dènk ! 8,40m L en 4,70m Br. De kepel hit boeëven de dobbel dier e klokketoereke, me, doo hit noets e klèksken èn gehange. De kepel ès van bènne hielegans oafgewèrkt mèt hoot. Doen ve ter de lèste kier èn gewèèst zijn, (2007) woas ter nog nèrget hootwèrm och olm èn te speere. Alleen de 27 kèrkstiel woeren oangetast en zijn vórtgehoald, jómmer genóg doer gewoen stiel vervange dei ter nie èn passe. Alleweil, oktoober 2011, stoeën ter wier echde kèrkstiel.

 

Histoerie

 

Het aadste deel ès gebód èn 1934 door Isidoor Meyvisch, alias : Voader Meeveske. 1937: Ómdat er zoeveel volk koem, hitter de kepel doen vergroet. Isidoor storf èn 1963, z’n zeens Louis  en Frans èrve grond en geboo. Doen den Heebloeëk verkoaveld woert, hèbbe ze goddank de kepel nie oangeroakt. De kinskènner van Isidoor hèbben de kepel vier 1 Bfr. verkocht op 15 jan. 1980 oan de ‘Parochiale Werken van Zwartberg’ . Allewijl, (noo 19 sep. 2006) beheert de kèrkfebrik het geboo. De kepel haa doen veel gelieën onner de vernielzècht van deegniete.

 

Het verhoal van het ontstoeën

 

Isidoor Meyvisch haa iet èn z’ne règgegrót. De dektoers (1930) kosten doo doen niks oan doehn …ongenèèslek…., en toch, èntige moeënde noo ’n bèèvert noo Banneux genoehs ‘r stillekesoan. Dankboar weiter woas, bóde hèè dei kepel achteroan èn z’nen hoeëf. Èlken doag óm 19 oer woert doo het Roehzenhiedsje gebèèd, ter iere van O.L.Vr. van Banneux, Maagd der Armen .

 

Deevoosie

 

Vieral èn de meemoond koem doo hiel veel volk. Van alle kante loepen ‘r pèèdsjes doer de hee noo dat kepelleke: out de Hoehve, Hoevezoavel, Stoole-Hee, Zwarbaerg-setee, de Voehgels- en Wolfsbaerg. As iemes ènne Hoehve storf, woert er drei doag noodegang de groete Roehzekrans gebèèd. Voader

Meeveske woas altoes de veerbèèër. De ‘Ex-Voto’s’ out wit marmer, bewijzen dat er veel minse troest en mesjein genèèzing gevonnen hèbbe.

De kepel ès braa rijk oan beelde. Op den altoor, vier het beeld van O.L.Vr., vènne ve de beeldsjes van St.-Jozef, de pestoer van Ars, het H. Poaterke van Hasselt. Hart, St.-Antonius van Padus, het H. Poaterke van Hasselt, St.-Franciscus, O.L.Vr. van Lourdes, O.L.Vr. van Rèst, O.L.Vr. van Bijstand, de Goede Herder… Wèème dei doo oetrs gezatten hit ès e ródsel.

 

Oafstammelinge van Voader Meeveske, (5° ginneroasie) wèèren heie nog gedoept èn dei kepel.

 

Wat hèbbe vèè, jing out de Hoehve, dèk gespeeld oan dat kepelleke, eekemollers gevange, iemers vol! Me voader Meeveske zoehg oos, zag niks me hoel oos toch ènne mot. Asser nie èn z’nen hoeëf oan ’t fritsele woas, loep ‘r doo, e bitsje vierieëver geboeëge, haan oppe règ, me dan altoes mèt de noster tèsse doum en wijsvinger.