‘ne Goeië ród kan noets gee kód.

Wilder lang en gelèkkig lèève ?
Moetder de boel lótte gewèère.
Lót óch noetsnie koeiëneere
blijf liever mer perbeere
óch vier niemes te zjeneere.
Zit óch toch nie op te frèète,
Krek wei wichter, dei mer kèèke.
Zijt mèt alles bèst tevrieë
en perbeert nie op te bieë.
Roapt geen jècht och rimmetiek
moeit óch noets mèt polletiek.
Zit nie èn den hók te ploeiëre,
lót óch nie te veel bemoeiëre,
wèrkt gerèst en op ’t gemoak,
bèlse bringt hiel geene boat.

Hat kop en viet maer lekker waerm,
vèlt reegelmóttig oeren daerm.
Van prakkezeere spoart oer kèpke,
Pakt nou en dan e lekker drèpke.
Lacht ieëverdoag ‘ne goeie bieët,
lost oaventou ‘ne faerme sjieët,
D’achterpoert moet oeëpe blijve
dat oer knieëk nie goeën verstijve.
De pillendraeërs moetder mije,
op ’t hikske nie lang stoeën vrije.
Lót vier de rest de poehs mer pisse,
zoe konder den dektoer woal misse.
Mèt de hinne slóppe goeën
nie sjouw zijn vrig op te stoeën.
Hat den innersten èn iere,
kiehkt doobij op gee ketier.
Lót de bekker z’n viedeekes,
Z’n gatoos en z’n pateekes,
platte kiehs op ’n snee broed,
smoakt verdoerie èève goed.
Kèrmisdoag, óch ‘ns goed begoaië
oan ’n poersie kermenoaië,
mèt ’n pan vol appelbrooië,
ès vier elk oan te rooie.
Zit nie te goape noo dèè mini,
zwijg mich stil van monokini.
Noo aaner vroolie moogder kiehke,
me oowee as ’t begint te jieëke,
gót dan op hous oan wei ‘nen trein,
want op ’n aaner ès ’t maer sjijn.

André Geraerts (alias André van Hannes, Gènkenaer van 1986), 22 miert 1983

Spelling 2001 en stem: Theo Achten