Plat Nouts 

Vliehgen ènne Ronde. (nouts 12 juli)

Dees wèèk trèkt de Ronde van Frankrek de baerg èn. Im de radiooverbènninge van de VRT met den tif bij het pilleton mieëgelek te moake, hebbe ze e vliehgmesjien vandoen. Geleeven och nie, de peloot ès toch woal ‘nen echde' Gènkenaer! Paul Spoape (Spaepen) deet dat al den twintigste kier.

Tot noo de tappen ènne Alpe hingter elken doag vijf tot zès oer ènne loch; 8000m hoehg, vetes: 240 km per oer.

De jóngste Gènkenaer dèè nog Gènker kalt, zèk mer ‘ne platte Gènkenaer ès (nouts 19 mee)

Weider al wèt, Andre Hellofs ès fóttoos oan ’t moake van minse dei nog Gènker kalle. Doo zètter dan hinne geboertendoatim bij en deet ze èntige weerd èn ’t Gènker zègge. Nou dènkter datter de jóngste Gènkenaer gevonnen hit dèè nog Plat Gènker kan kalle. Vierige wèèk koem ‘r bij Dries Houben oan, 28 joor, zoeën van Jos en Lisette Vanhengel. Z’n ieëvergroetvoader woas Thievesse Groar, (Gerard Houben) ‘ne slachter dèè lang joere gelieë vaerke gónk slachten oan hous. As Dries de jóngsten ès, dan wieëte ve dat op ’t èn van dees iew, niemes nog Gènker kan kalle. Dat moet ènne goate gehaage wèère. Asder iemes kent dèè nog jónger ès en nog Gènker kalt, dan efkes tijn gèèven oan: andre.hellofs@telenet.be

Trèkzakke (Nouts - 15 april)

E span wei Jean-Pierre(Jempi) Trippaers en Hugo Martens kómder nog zelden tieëge. Twie men (manne) dei trèkkend out den trèkzak hoale wat er ènzit. Zonner veel kómplemente, zeiver oppe grót (rechtou-rechoan). Dat kèmt ooch zoe oan bij het pebliehk. Mèt ‘ne reesem wijskes out vrigger joere, rech out het hart, ech im zoe spontoan mèt te zènge. ’t Zijn nog twie miezekante, dei spieëlentaere op dat volksinstrement de harte van de minse nog doehn oeëpebleeë.

Hotel Continental (Nouts - 14 april)

Het gekènde hootel Continental oppe setee èn Woatersjee wiert hielegans vernouwd. Het hotel woas vrigger bewoend doer legöörs. Én 2005 woert het oangekocht doer ‘Nieuw-Dak’. Bij de resteroasie vanne gèèvels wiert rèèkening gehaage mèt de tiepisse bootrant van dei setee. Bènne wèèren de zèsentwintig koamers imgebód tot twelf studioos. Ze wèère loater verhierd oan minse dei woenhèlp vandoen hebbe.

De St.-Janssjool (Nouts - 27 miert)

Oane Onnerwijsloan èn Woatersjee zijn ze begos met de oafbroak van den achterkant vanne St. Janssjool. De klasse boe de ‘huishoudsjool’ hous hoel, boe èn den oerlog (‘40-’45) de sjoolsop gekoeëkt woert, verdwijne. Vierleepig wèèren er kontèènerklasse doalgezatte. Ternoo kèmter ’n nouw sjool, dei èn september 2011 moet vèèrig zijn. De boutekant vanne boo blijft behaage, de bènnekant wiert imgebód tot woeninge.

Ierebèrger (Nouts - 11 miert)

Noo Luc Dhoore krieëg nou as twiede, krek tachetig joor gewoere prof.dr. Jan Goossens het ierbèrgersjap vanne stad Gènk. Jan Goossens hit as hiel hoehg internasjenoal gewaardeerde lètterkindige ooch oandacht gehad vier de dialekte, vaneeges ooch vier zijn en oos Gènker dialekt. ’t Es doer zijn toudoehn dat ver nou ’n hiel goei spelling hebbe im het Gènker te sjrijve. “ Hèè ès doodoer iemes dèè hiel boanbrèèkend en verdienstelek waerk gelieëverd hit vier oos Gènker gemeensjap,” stèlde ooze bèrgemeester Wim Dries.

Jan hit zoe ontrent 600 weetensjappeleke waerke gepiblieseerd. Jan zag van z’n eege datter mer e middelmóttig verstand hit me woal hiel nousjierig en koppig ès. “Twie ondeegden dei der as weetensjapper hebbe moet,” grapde Jan ieëver z’n eege.

Èn ze ‘Meziehk ènne Gènker Toal’ loeter oos het versjil hiere tèssen dei ‘stoet- en sleeptoene’ èn de Gènker klanke. As eksempel goehf ‘r: Het kintsje (stt) hit e mals kintsje (slpt).

De Resteroasie (Nouts - 11 miert)

‘t Ès bekan zoe wijd, de resteroasie vanne gèèvels van de St.-Martinuskèrk ès hoost vèèrig.  De veergèèvel zijn ze oan ’t oafwèrke, ’n deel van den achtergèèvel moet nog oaangepakt wèère.

De wijzers vanne klokken oan de vier kante van den toere wèèren ooch gerippereerd; noo tien joor ènnen dónkel wèère ze wier verlicht. Nou hèmme bratsende och op stap zijnde Gènkenaere geen ekskuus nemie im te loat tinnes te koeëme.